الأساسيات الـخمسه قبل أن تطلع اي قومة لتحصل على افضل النتائج لصالحك & مـــهـــمـ

**ALKETO** · 01-08-2007 12:29 AM

السلام عليكم ورحمة الله وبركاته
وجدت ضرورة لكتابة هذا الموضوع لأن واجد من الشباب معاهم مواتر قوية ولكن شغلات بسيطة جداً تخرب عليهم وتحول النتيجه من إنها تكون له وتصير عليه ...

وكلنا مللنا من الفيديوات الملعوب فيها بإتفاق مسبق مع أصحاب السيارات المنافسة بهدف تغيير الحقائق وإن سيارتي أقوى من السيارة الفلانية ..

أنا بصراحة بتكلم من خبرتي البسيطة مع القومات وللمعلومية ماطلعت إلا بأتوماتيك فأصحاب العادي يضيفون ملاحظاتهم ..

وللمعلومية الموضوع هذا أنا كتبته وهو مفتوح للنقاش و كل معلومة فيه تحتمل الصواب والخطأ ..

الأمور الأساسية التي لاغنى عن التركيز عليها قبل كل قومة :

1- تانكي البنزين : بإختصار فضي أم أمه لاتخلي إلا 10-15 لتر بس يعني حبة ونص بالكثييييير .. الي يكفيك حق عدد معقول من القومات ويوصلك مرتاح للمحطه بعد المقاوم ..
وعشان ماتنتكب إذا صارت لك قومة مفاجأة لاتعبي أكثر من نص التانكي حتى لو ماعندك قومه ..

التأثير : التانكي شبه الفاضي يعطيك نص سيارة فرق حسب تجربتي ..

2- المرافقين : أسوأ شي ممكن تتوقعه ! شخص واحد مرافق بوزن 80 كيلو بدون مبالغة يمكن يحول سيارتك مثلاً إذا كانت أم 6 سلندر لنفس السيارة ولكن بقوة 4 سلندر .. هذا كيف إذا كان معاك 2 ولا 3 إغـــســـل يدك ..

التأثير : شخص واحد أبو 85 كيلو بيعطي فرق من سيارة إلى سيارة ونص .. مجربة أكثر من مرة ..

3- المكيف : معروف إنه يضعف من قوة السيارة .. ما أعرف ليه ولكن يمكن لأنه متصل بنفس السير الي يحرك المكينة ..

التأثير : غير متأكد منه ولكن شيء متعارف عليه لا أكثر ..

4- النوافذ والفتحة : بإختــصــار ســـــــــــكـــــــــرهم كلهم .. لأنها تقلل من إنسيابية السيارة بشكل كبير جداً ..

التأثير : تأثير لايستهان به وقرأت دراسة في مجلة أمريكية قبل فترة تفيد إن فتح النوافذ أثناء سير السيارة يرفع من إستهلاك الوقود بشكل كبير حسب ماذكروه ..

5- حرارة المكينة : لاتحاول تدعس وتحرق المكينة وإنت رايح للقومة أو إنك تطلع كم قومة تجريبية قبل القومة الي عليها الكلام .. سخونة المحرك بتأثر سلباً عليك ..

التأثير : تأثير واضح يزيد مع زيادة حرارة المكينة وبتلاحظ الفرق بنفسك بعد كم قومة ..

إضافة لأصحاب القير العادي :

6- تحكير القير على آر بي إم معقول: بحيث يعطيك قوة معقولة و مع أقل قرص ممكن .. وإذا كنت طالع مع سيارة قوية دور لك شارع خشن شوي عشان يمديك تحكر الآر بي إم صح وتطلع بقوة أكبر بدون دوران الكفرات على نفسها..

7- القير الأتوماتيك لاتحكر أعلى من 1500 لأنك بتعدم القير وخذها مني <<<< له سوابق في القيور مطيح قير كراون فيكتوريا وسوبارو 4x4 مرتين ..

ملاحظات :

*إذا كنت مهتم جداً بتصوير المقطع وسيارتك أوتو وتريد في نفس الوقت توفير وزن المصور خلك على يمين الي بتقاوم معاه عشان تصور القومه من خلال المرايا

* الملاحظة الأهم "الأمــانة" إذا كنت بتنزل الفيديو في المنتديات وإنك ماتتلاعب بالفيديو بحيث تقطع الجزء الي سبقك فيه الطرف الثاني ولا لما بدا يقرب منك أو إنك تتفق معاه إنه يخفف بعد سرعة معينة بحيث يظهر إنك طلعت عليه ... لأن وبإختصار وش الفايدة تضيع وقتك ووقتنا معاك !! ..

شاكر لكم قرائتكم للموضوع وأكرر إن الموضوع مفتوح للإضافات والنقاش

منقول